ZORAM TODAY| Aizawl 5th June, 2024 (Wed): Vawiin June ni 5 (Nilaini) hi World Environment Day (WED) 2024 niin khawvêl puma lawm a nih rualin Mizoram Pollution Control Board chuan Chanmari YMA Hall-ah lawmna hun an hmang.

He hun hi Rebec Lalhruaimawii’n kaihruaiin MPCB Chairman Liankima Lailung (IFS Rtd.)-in a hmanpuiin thu a sawi a, "Kan leilungte hi uluk lehzual kan enkawl a ngai a, tui leh boruak thianghlim tam zâwk kan neih theihna tur a ni a, ngaihtuahna thar pû-in tunah hian bul kan tan nghal a ngai a, kan khawvêl lo hi mihringte hian chênna tur khawvêl dang kan nei lo tih hre tharin leilung leh tui leh boruakte kan enkawl that a pawimawh a ni," a ti.

Mizoram Environmental NGOs Coordination Committee (MENCO) General Secretary Vanlalhrima’n Power-Point Presentation hmanga zirtirna pe-in a telpui a, "Khawvêla thil awm zawng zawng hian awm dân tur fel taka duansâ kan nei vek a, chu chu mihringte hian hmasâwnna kawngah kan tichhe thin a, chuvângin environment chhe zêl tur veng tur hian mimal tinte hian mawhphurhna kan nei a ni," a ti bawk.

Benjamin Lalnunsanga Colney, P.O, Mizoram EIACP Hub chuan kumin World Environment Day puala MPCB chêt vêlna hrang hrang report a pe a, MPCB hian WED pual hian zirlaite nen District hrang hrangah Mass Rally neiin Aizawl vêng hrang hrangah E-Waste Management Drive  an nei .